Joh 7 | MHL | STEP | Aria Yeesus Yuudia kame ikiwowa nain wi Yuuda amis mua-ke o ifakimowa maemik. Naapeya Galili kame-pa nan-pariw ikok uuwam-miek.

John 7

Yeesus ona wiamun unow onaiya maapora ikiwowa aakunemik

1 Aria Yeesus Yuudia kame ikiwowa nain wi Yuuda amis mua-ke o ifakimowa maemik. Naapeya Galili kame-pa nan-pariw ikok uuwam-miek. 2 Ne wi Yuuda maapora oko, maa esimsa kuowa maapora naimik nain wiar mamaiyarek. 3 Ne Yeesus ona wiamun unowa-ke maakemik, “No Yuudia kame ikiwep maa miililina oneya nena teeria unowa nefar urufuk. 4 Mua-ko eena maa miililina onowa ariman efar urufap amisaruk naep maa kokot me oniya. Naapeya no ikip maa ariman oneya miiw unowa mua nefar urufuk.” 5 Ona wiamun unowa opora me wiar opam-ikemik, naapeya naap maakemik. 6 Ne wia maakek, “Yo epa eewuar. Ni epa anane naap ikaiya. 7 Miiw mua unowa ni me nia iiwuarimik, weetak, yo efa iiwuarimik. Moram sira samora onimik nain yos-ke ariman wiar wuami maiyem. 8 Ni eliw ikiwep maapora urufeka. Yo epa eewuar, naeya me ikiwinen.” 9 Naap wia maakep ona Galili-pa nan ikua.

Yeesus pun maapora nain ikiwok

10 Aria ona wiamun unowa ikiwep Yerusalem-pa nan ikaiwkin o aakisa fan ikiwok. Ariman me ikiwok, kokot ikiwok. 11 Iir nain wi Yuuda o akupami wiam nokarem-miemik, “Nee, mua nain-ko ekapok-i?” 12 O muuta nain senam aakunemik. Papako-ke maemik, “O mua eliwa-ke,” ne papako-ke maemik, “Weetak, os-ke wia ekerami era samora-pa wia pikiwiya.” 13 Nain ariman me maem-miemik, moram wi Yuuda woos mua yia samorikuan naep wia keker opamik.

14 Maapora gone-pa ikaiwkin Yeesus ikip fuunep tempel urupep pika kemena-pa opora wia maakem-ikua. 15 Aria wi Yuuda naap urufap kakaemi maemik, “Nee, mua fain suule-ko me ikiwok, o amis maneka naap nain kaanek aawok?” 16 Ne wia maakek, “Yo amisa fain me yena kakeniw amisa-ke, weetak. Mua eena efa sesekak nain-ke yiek. 17 Yo opora fain Mua Maneka wiar ekapok-i e oram yena kema-pa maiyem, nain mua eena Mua Maneka kookalowa ookiyem naiya nain efar furewap makena mainon. 18 Mua ona wame purupekam naep opor unowa ona kema-pa mainon. Ne mua eena o sesekeya ekapok nain unuma wiar pirowa kookaliya nain mua makena-ke, wadol marew. 19 Ni Moses sira-ko me niek-i? Nain ni unowiya o sira wuomakek nain iiwawun-ko wiar ookiman-i? Naap nain ni moram yo efa ifakimu naep oniman?” 20 Naeya maakemik, “No sawur-ke nefa anirawamik. Mua naareke nefa ifakimekam naep oniya?” 21 Ne wia maakek, “Yo maa miililina kuisow eena onam nain ni urufap kakaiman. 22 Ni fain kema suuweka, Moses-ke mia kanima puukowa sira nain nieya ni Sabat epa pun muuka mia kanima wia puukiman. Nain me Moses-ke sira nain imenak, sira nain iiriw nembesir-pa ekapok. 23 Naapeya ni Moses sira me wiar puukiyen naep Sabat-pa mia kanima eliw puukiyen naiman. Nain yo Sabat-pa mua wia saliwamkun ni moram efa amukariman? 24 Ni oram mokoka-pa urufap me maeka. Ni maa baliwep kema suuwap makena-ke naep maeka.” Naap maek.

Yeesus makena Krais-ki e weetak

25 Aria wi Yerusalem mua papako-ke maemik, “Nee, mua fain ifakimu naep maimik nain faneka ya. 26 Ne mua unow mokoka-pa opora maeya mua kuisow o-ko me kiripomimik. Wi anim onoma pun o makena Krais-ke naimik-yon-i? 27 Ne o epa ekapok nain i amisaremik. Nain ikoka Krais epa ekapiya nain mua kuisow me amisariyen,” naap maemik. 28 Aria Yeesus tempel pika kemena-pa emeria mua opora wia maakemi kerew farep maek, “Ae, ni yo efa amisareman, ne epa ekapem nain pun efa amisareman. Naap-i? Nain yo me yenaiw ekapep fan ikem! O eena efa sesekak nain opor makena onoma os. Ni o me amisareman, 29 nain yos-ke amisarem. Moram o wiar ikemkun ona efa sesekeya fan ekapem,” naap maek. 30 Naap maeya opu naep uufunemik, nain o epa eewuar ikaeya me opamik. 31 Ne iir nain pun mua unow akena o makena wiar naemik. Neemi maemik, “Mua fain maa miililina unowa oniya noma. Ne Krais ikoka ekapowa naimik nain o nomakep unow akena oninon-i?” 32 Naap maem-ikaiwkin wi Farisi-ke wia miimamik. Naapeya wi pris woos mua wiamiya aakunep tempel ami mua wia sesekamik, wi ikiwep opuk naep.

33 Aria Yeesus aakunemi feenap wia maakek, “Yo epa maala ni niamiya me ikainen. Yo o eena efa sesekak nain wiar ikiwowa-ke. 34 Iir nain yo efa akupowen-na wia, me efa imenowen, ne epa yo ikiwep ikainen nain ni kamenap ikiwowen.” 35 Ne wi Yuuda-ke maemik, “Nee, kaanek ikiweya i me urufiyen yia naiya noma? I Yuuda unowa eena Grik owow unowa-pa ikemik nain neek wiar ikiwep Mua Maneka opora wia maakekam naep naap maiya-i? 36 Kamenap maemi feenap maek, ‘Ni yo efa akupowen-na wia, me efa imenowen. Ne yo ikip ikaiyem nain ni ikiwowa me pepek.’” Naap maem-ikemik.

37 Aria maapora nain weeserow fofa kererek, fofa nain manek akena. Iir nain Yeesus iimarep kerewa kiriremi maek, “Mua eena kema enekariya nain yo efar ekapep eka eniminok. 38 Ne mua eena yo opora efar miimiya nain eka anane kema-pa wiar imenarem-ikainon, eka arona-pa imenarem-ikaiya naap, eena Mua Maneka opora maek naap.” 39 Ewar Eliwa maemi eka maek. Mua eena o opora wiar opiya nain Ewar Eliwa aawinon. Nain iir nain eewuar, moram Yeesus unum maneka me aawowa ikua.

40 Wi naap miimap papako-ke maemik, “Aa, mua fain profet makena-ke.” 41 Ne papako-ke maemik, “O Krais-ke.” Ne teeria oko-ke maemik, “Krais eliw Galili kame-pa imenarinon-i? Weetak. 42 Moram Mua Maneka opora feenap maek, Krais ikoka Yuudia kame Betlehem owowa-pa imenarinon, Dewit kerekera-pa.” 43 Wi Yeesus muuta nain naap aakunemi wiam pukep erup aremik. 44 Ne papako opu naemik, nain mua kuisow-ko ekap me opak.

45 Aria wi tempel ami mua oram kirep ikiwiwkin wi pris woos mua ne wi Farisi-ke wia nokaremik, “Ni moram me opap pekapeman?” 46 Ne wia maakemik, “O opora eena maiya nain mua kuisow naap-ko me maimik.” 47 Ne wi Farisi-ke wia maakemik, “Ne nis pun naap nia wadolalowak-i? Ae-na. 48 I woos mua ne i Farisi mua kuisow opora-ko wiar opimik-i? 49 Wi mua o opora wiar ookimik nain wi kema marew-ke, Moses sira me wiar amisaremik. Wi nain pina-pa ikemik, iiwawun maa anima mia-pa wiam wuap-puamik,” naap maemik. 50 Ne Farisi mua oko, unuma Nikodemus, mua nain iir oko Yeesus wiar ikiwok. 51 Os-ke wia maakek, “Nee, i sira naap-ko yiar ikua-i? Mua opora me wiar mekawowa, o pina onak naimik-i?” 52 Naeya wis-ke maakemik, “Aa, nos pun Galili mua-ke-yon aa? No Mua Maneka opora baliwep urufap amisarinan, profet Galili kame-pa me imenarinon,” naap maakemik. ^{▼▼7.52Opora fain (1-11) Yon ona me siisimok-yon. Wi amis mua-ke maimik, mua oko-ke siisimep fan mikowawamik.}